▲ 在2012年7月7日早上於順緻苑開街站，支持者送上三支寶礦力水特。
時間真係過得快，話說上年呢個時間，係黃洋達敗選立法會九龍東的日子，記得上年呢段時間，小弟幫佢助選，我一直都唔係佢嘅 fans ，亦冇睇過佢嘅著作，只係睇〈皇上有話兒〉同埋〈早朝天下〉認識佢，後來再聽佢另一個網台節目〈笑死朕〉，機緣巧合之下參與第一次網聚，認識 Darling ，之後就加入「熱血公民」，第一次幫手係 3 月 1 日，在觀塘地鐵站派「反貪曾」傳單。我點解會幫佢助選？因為我相信，當佢選咗入立法會之後，肯定會有更多年輕一代留意時事。黃洋達的說話雖然未必完全有道理，但至少容易入腦，一聽就明。政治呢樣嘢，本來可以好簡單，但要講到令人明白就不容易。我撐佢，除咗因為撐人力，就係希望更多人了解香港身邊所發生的事。
有人會問，作為一個人力支持者，曾經幫佢助選有冇後悔過？我好肯定答：「唔會」，正如黃毓民同人力反面，我到現在仍然認為在立法會上不能缺少黃毓民，只是不認同他離開人力的理由而已。至於黃洋達，我從不覺得他會加入「人力」，敗選第二天話自己不支持人力，但我不介意，只介意他向人網開戰，搞到人網執笠，搞到我冇得睇 Loved.hk 的〈美人計〉；其次就是他的「鳩做論」，這是我不再支持他，正式退出「熱血公民」的另一個主要理由。
小弟認為，是否「鳩做」，要做過至知，未做過就話「鳩做」即係「鳩噏」，「未有實質成果之前，我們千萬不要放棄夢想」嘛，你預見人「鳩做」，點解唔去阻止，又或者夾實佢？呢啲道理都唔識？點同人哋做長期抗爭？
後話：我話我唔介意黃洋達話從不支持人力，係因為我一早已經知道，基本上佢講唔講，都對我心情影響不大，只不過佢講咗呢句說話之後，搞到我好煩。另外，劉嗡响我篇文的回應中，提及到「『從來不支持人民力量』，在政治上可說是天誅地滅、天地不容的說法。」小弟十分認同，基本上佢以後都唔駛去選舉了。
